BUJUMBURA, 25 Ruheshi 2026 – Umukuru w’Igihugu c’Uburundi akaba n’Umukuru w’Umuryango w’Ubumwe bwa Afrika, Nyenicubahiro Evariste Ndayishimiye, yakiriye kuri uyu wa kane ku Kirimba kwa Ntare abaserukizi batatu b’ibihugu vya Mali, Mauritania na Bangladesh baje gushikiriza amakete abagena guserukira ibihugu vyabo mu Burundi.

Abo baserukizi ni Seydou Coulibaly, aserukira igihugu ca Mali, ubuserukizi bwiwe bukaba bufise icicaro i Luanda muri Angola; El Houssein Ould Nagi, aserukira igihugu ca Mauritania, ubuserukizi bwiwe bukaba bufise icicaro i Addis-Abeba muri Ethiopia; hamwe na Sitwat Nayeem, aserukira igihugu ca Bangladesh, nawe ubuserukizi bwiwe bukaba bufise icicaro i Addis-Abeba muri Ethiopia.

Nk'uko vyashikirijwe n’Umuvugizi w’Umukuru w’Igihugu, Nancy Ninette Mutoni, ibiganiro vyabaye hagati y’Umukuru w’Igihugu n’abo baserukizi vyibanze cane ku migenderanire n’ubufatanye hagati y’Uburundi n’ibihugu baje guserukira.

Mu biganiro yagiranye n’uwaserukiye igihugu ca Mali, Seydou Coulibaly, Umukuru w’Igihugu yashimikiye ku kamaro k’amahoro n’umutekano mu karere ka Sahel, aho impande zompi zashimye ingingo n’utwigoro Uburundi bukomeza kugira mu gushigikira amahoro no kurwanya iterabwoba ryugarije ako karere.

Ku ruhande rw’uwaserukiye Mauritania, ibiganiro vyagarutse ku gukomeza imigenderanire myiza ishingiye ku bufatanye hagati y’ibihugu vya Afrika, cane cane mu vya politike, ubutunzi n’iterambere ry’umugabane.

Nayo uwaserukiye Bangladesh, Sitwat Nayeem, yaganiriye n’Umukuru w’Igihugu ku buryo bwo gutsimbataza imigenderanire hagati y’ibihugu vyompi, hisunzwe cane iterambere ry’ubutunzi n’uguteza imbere igisata c’uburimyi, gifise uruhara runini mu mibereho y’abanyagihugu.

Mu gusozera uwo muhango, Nyenicubahiro Evariste Ndayishimiye yarakiriye neza abo baserukizi, arabaha ikaze mu Burundi, yongera arabipfuriza kuroranirwa mu mabanga mashasha bajejwe n’ibihugu vyabo.

Iryo yakirwa ry’abo baserukizi ni ikimenyetso ciza cerekana ugukomeza kw’imigenderanire y’Uburundi n’amakungu hamwe n’uruhara igihugu gikomeza kugira mu gutsimbataza ubufatanye mpuzamakungu.

Inkuru ya RTR ONLINE 🇧🇮